基金會辦攝影展記錄抗爭 宣揚人民作主精神

人民作主基金會長期用靜坐,雙跤行臺灣的方式,宣揚臺灣人做國家主人的精神。今年人民作主基金會也辦攝影展,共焦點囥佇咧降低修憲標準,分享過去這20外冬以來,是按怎一步一跤印,傳承人民作主的精神。

人民作主教育基金會志工戴瓜笠仔、穿in的制服,佇2017年12月初,列隊踅總統府外圍三輾,要求立法院速速完成公投法補正,記錄當當時警察行佇志工邊仔,維安情景的攝影師,也是基金會志工的張堂庫,講起這段,記持猶原真深。

毋但這張相片,張堂庫也記錄著,美麗島事件受難者林義雄先生,佇林家血案發生了後的36年,和人民作主行踏志工團做伙去景美人權文化紀念園區第一法庭的場景。

6冬前張堂庫加入人民作主基金會, 行佇隊伍以外,記錄志工一步一跤印,行佇民主前輩的後壁,捒民主的千里路,遮的相片,已經佇雲林、彰化展示過,這陣來到台北剝皮寮園區上尾站。

佇展區現場替人導覽,今年69歲的資深志工邱珍雅,已經綴基金會行踏26年,曾和in翁佇反核四公投鬥發傳單,雖罔in翁已經無佇咧矣,不過伊猶是繼續行。

今年人民作主志工團注心捒降低修憲門檻,in講,無論好天歹天,in攏欲繼續行,用恬靜的方式,宣揚台灣人愛做國家主人的願望,深化民主。

延伸閱讀
最新生活新聞
人氣生活新聞
行動版 電腦版