作詞融合白色恐怖 臺灣歌手著美國JPF音樂獎

臺語音樂的媠,這陣是連國際攏肯定,臺灣頭一位用白色恐怖歷史唱rap的歌手張睿銓,雖罔已經十幾年無閣創作,攏咧教冊,舊年底猶是提著美國獨立音樂最佳RAP專輯獎的頭獎,美國評審聽無台語,毋過肯定咱的歌手創作音樂的態度和心血,咱也做伙來聽台語Rap。

對白色恐怖、林義雄血案、唱到言論和思想自由予政府束縛,就連母語節目也予政府禁起來,台語Rapper 張睿銓,這塊號做「囡仔」的歌,也唱出伊對序細的向望。

換另外一種風格,張睿銓仝款以台語做基礎,伊閣用英語rap,就是希望世界各國的人知影台語就是my language我的語言。

張睿銓佇讀大學的時,就組樂團、欲借重金屬音樂的力頭,展現台語音樂的媠,伊讀袂少後殖民時代的冊,用十年,創作15首歌,收做這塊叫EXODUS出走的專輯,佇2020年尾,提著美國獨立音樂獎JPF最佳Rap專輯獎。

其實張睿銓是佇發行了後的第十一冬才得頂,這中央有欲20年,伊攏咧大學教英語、早就脫離音樂界,雖罔心內難免有寡仔感慨,不過伊無遺憾。

就若像大隻雞慢啼,張睿銓費心神做的專輯雖罔有較晏予人注目,不過伊講,伊會繼續用正義和保護弱勢的心情,用心創作,予音樂無國界,也欲參遮的音樂種子鬥陣替台語音樂發聲。

最新生活新聞
人氣生活新聞
行動版 電腦版